Odarc - Office du Développement Agricole et Rural de Corse

Un prugramma strutturatu è assai variu

Ghjurnata tennica, un scambiu in giru à l'urtaglia biulogica

Amandine ci face scopre u so sfruttamentu è u so mistieru, mintuendu i vantaghji è i svantaghji di quellu. i prufili eranu sfarenti, à chì vulia stallassi in muntagna, à chì in Purtivechju, in Casinca o ancu in Aiacciu. Trà di elli, parechji vulianu stallassi ma certi eranu digià sfruttanti ma tutti in ricerca di cunsiglii primurosi.
Sta ghjurnata cù un prugramma strutturatu in parechji temi (piantina, terra, innacquera, pustime, manetnimentu, pruttezzione, cugliera, cumercialisazione, analisi meteurulogica...) ci hà permessu di scopre è di capisce u mistieru d'urtulanu in biulogica sottu à tutte e so forme. Amandine ci hà guidatu annnantu à u sfruttamentu per pruvà a primura d'una agricultura biulogica.

" l'impurtanza in u mistieru d'urtulanu hè di sapè induve andemu è induve pudemu piglià i cunsiglii"
Amandine Ollier de Marichard.

I cumandamenti di l'urtulanu

Un urtulanu deve, soprattuttu, piglià in contu l'ambiente in giru à ellu è pruvà à aduprà ogni risorsa di u so sfruttamentu. Prima di tuttu deve analizà u so terrenu è pruvà à capì a so terra (hè sabiona? grassa? acquosa ? ecc...). Quandu a terra hè guastata, vale à dì quandu u strattu urganicu hè statu strappatu sia da l'apparechji agriculi o sia da una gattiva cultura, ci vole à pocu pressu 5 à 6 anni per rifà lu. Per stu fattu, Amandine hè contru à ste pratiche è favurisce l'aduprera di cuncime verdi, biate è di a pascitura per mantene l'equilibriu naturale di u so terrenu.

Un urtulanu deve piglià in contu u climà è e so specifità. In Corsica, hè un climà propiu à u Mediterraniu cù acquazzoli è sulleoni. L'urtaglia hè una pratica cumplessa. Per via d'arensi agriculi è di l'innacquera, l'urtulanu deve dà à a so terra tutte e cundizione per favurisce u sviluppu di e so culture per pudè assicurà a purusità di u terrenu necessaria à u benestà di e piante.

"ci hè un leame affettivu à a terra è ci vole à piglià in contu u ciculu di a vita, rimette si à a so piazza è stabilisce l'equilibriu di e cose"

I cunsiglii d'Amandine

Unu di i preziosi cunsiglii d'Amandine hè i diversificà e so varietà. A tagliera di certe piante permette di megliurà u sviluppu di l'urtulame, ad esempiu, quandu una pianta ùn hè micca tagliata quessa hà da esse mena pruduttiva invece chì una pianta tagliata hà da dà urutlame più grossi è più numerosi. Una di e difficultà maiò, sò e malatie chì ponu tuccà l'urtulame è e so piante (virose, drosophyne, caratite, ecc...) Sò assai numerose è certe volte senza rimediu efficace. Amandine mintueghja chì avè ape è pecure hè un attù maiò pè mantene l'equilibriu di u terrenu.

L'innacquera hè un travagliu maiò chì piglia assai tempu, à pocu pressu una matina sana. Per pruvà sta faccenda, Amandine ricummanda un riloghju prugrammatu ma dinù un riduttore d'incalcata (1L/ore). Per chì a cultura sia pruduttiva, a terra deve esse bè innacquata.

"l'urtaglia hè cum'un sportu di altu livellu, ci vole una bona cundizione fisica"

E varietà è Interbio

Amandine dispone di parechje varietà d'urtulame, pumate, zucche, pomi dolci, cipolle, pivaroni, piante arumatiche ma dinù frutti di a passione ! tuttue què hè pussibule perchè Interbio dà a pussibilità à i sfruttanti in bio d'ottene piante à prezzi ragiunevule per pudè megliurà a diversificazione di e culture biulogiche. Bella sicura, ci vole à fà una selezzione per pudè esse pruduttivu è micca risicà di perde di più ch'omu hà investitu.
ci vole dinù adattà si è agisce in funzione di e so culture, appruntà una fertilisazione mirata è curà ogni cultura.

IMG_6000.jpg (356.92 Ko)

Un mestieru appassiunatu

U sintimu chì supranava a ghjurnata era a passione. A passione di a terra, cum'ella hà mintutatu capunanzu Amandine, ci hè une leame affettivu assai impurtante. Ci hè dinù una vulintà di trasmette u sapè fà per chì sta pratica ùn moressi mai. Sta ghjurnata ci hà permessu di realizà a primura di i mestieri di l'agricultura, soprattuttu l'urtaglia, per u benestà di e pupulazione ma ancu per l'equilibriu di l'ambiente.